04 – Doringrivier balkesaag kampioen

Vir Danie (Big Dee) Vermeulen, wie se roudiens Vrydag is.
Jy kon mos, jy het mos!
Ek gaan ons steak lunches en lugkastele bou by die Botrivier hotel mis.
Nag ou grote. Safe travels.

Daar word beweer die verteller is allesbehalwe ‘n rustige slaper, en dat die enigste instrument waarmee die verteller se snork effektief gemeet kan word die richterskaal is.

Dit is al byna twee dekades of ongeveer veertig kilogram gelede, afhangend van die gekose maateenheid. Die uwe het pas vir ‘n derde maatskappy begin werk sonder om van lessenaar te verwissel, en die nuwe eienaar nooi die oorblywende klompie van ons wat die afgelope 3 jaar se korporatiewe “herstrukturering” oorleef het vir ‘n bosberaad gevolg deur ‘n drie dae white water rafting spanbou op die Doring Rivier.

Nou as jy moet vra waar die Doring rivier is, dan is jy klaar verdwaal. Kyk, as jy nou ry tot in die middel van nowhere en nêrens…en jy draai daar links, dan is dit nog so 130 kilometer! Die stuk van die Doring waar ons sou roei kronkel deur ‘n rafyn in die Cederberge met die basiskamp op ‘n plaas geleë kort neffens die Tankwa Karoo nasionale park, by ‘n plek genaamd “Die Mond”op daardie ellelange stuk grondpad tussen Ceres en Calvinia. Daar is ons bosberaad-cum-Codesa gehou.

Toe dit tyd raak vir slaapreëlings tref op die eerste aand word ek, as jongste in die maatskappy, saam met Big Dee in ‘n kamer ingedeel. Big Dee is ‘n man wat ‘n reputasie gehad het dat hy die chroom van ‘n Chevvy se wieldoppe kon afsnork, en menige kollega het al die volgende oggend met bloedbelope oë en ‘n verstarde gesigte tevoorskyn gekom uit ‘n kamer wat hy met Big Dee gedeel het, maar van al hierdie dinge wis ek natuurlik toe niks.

Man, ek het net so by die poorte van droomland verbygesluip toe ‘n vark my daar voorlê en beduie na ‘n hoop bome toe wat voor die volgende oggend planke gemaak moes word. Big Dee was klaar besig, so ek gryp toe maar self ‘n klein kettingsagie daar uit die gereedskapstoor uit en begin opwarm deur die klein takkies van die stompe af te sny. Aan sy ritme kon ek hoor dat Big Dee nou al behoorlik warm was, en kort voor lank toe hoor ek bokant die lawaai van my sagie hoe hy die groot ou treksaag laat sing deur die hout. Grrrrrrrr sjuuuuut. Grrrrrr sjuuuut. Die saagsels staan sommer so ‘n boog en ek besef as ek hier ‘n kans wil hê sal ek drasties moet planmaak. Ek loop ruil daai kettingsagie in die stoor vir die moeder van alle sae. Die ding se lem is ‘n caterpillar D11 bulldozer se een spoor waarvan die kante skerp geslyp is, en toe ek daai masjien start begin die hele kamer bewe.

En ek saag en Big Dee saag en die hoop planke raak al groter, maar ek kry hom nie ingehaal nie. Dis naderhand anderkant drie uur in die more maar nes ek dink nou het ek hom, dan verdwyn hy in ‘n boog van saagsels onder die volgende stomp in. Van sy kant van die hoop af klink dit nou kompleet soos die donderweer van ‘n hoëveldse donderstorm, maar ek durf nie opkyk nie, want om op te kyk sal my tyd kos. Die rooi van die nuwe dagbreek wys al goed ‘n halfuur op die horison toe ek die laaste plank sny en daai monstersaag afskakel. In die vroeë more-ure het die ouderdom vir Big Dee begin inhaal en ek kon hom verbyvat. Toe ek saggies by die kamer uitsluip was hy nog hard aan die saag.

In die kombuis kry ek tot my verbasing al my kollegas reeds wakker met koffie in die hand, hulle oë vreesbevange. Hulle vertel verskriklike stories van die onheiligste geraas, ligte wat uit die dak getuimel het en kaste wat omval. Pretoors moes glad sy katel deur die nag met bloudraad repareer nadat dit uitmekaar geskud het en twee ander manne wat ook in die kamp was vir ‘n jaguitstappie is glo deur die nag inderhaas daar weg, net so in hulle slaapklere. Die plaasboer steek sy kop by die deur in en sê dat hulle darem weer die listerpomp op sy fondasie kon terugkry en dat daar nou water in die tenks sal wees vir stort.

Ons was al almal klaar met ons ablusies en op ons derde koffie toe Big Dee met bloedbelope oë en strak gesig uit die kamer stompel en plegtig belowe dat hy nie omgee of hy kaalgat buite onder ‘n boom in die yskoue Junie Karoonag moet slaap nie, maar met my deel hy nooit weer ‘n kamer nie.

En dit was dit. Daardie aand slaap ek toe alleen in ‘n kamer, Big Dee het by Pretoorsie gaan intrek. Vir die drie nagte op die rivier het die hele groep eers gewag om te sien waar ek my tent opslaan voor hulle op die verste moontlike punt van my af hulle s’n gaan opslaan het. Sedertdien het ek nog altyd alleen in ‘n tent/kamer ingedeel as daar ‘n weggaan geleentheid was, tot meer onlangs toe ons ‘n spanbou met kwadfietse teen die Weskus op gehad het. Die laaste aand na ons die fietse teruggegee het slaap ons in die Laaiplek hotel op Velddrif, en kollega J word by my ingedeel, synde dat die hotel redelik vol was en hy die jongste in die maatskappy is. Toe ons gaan slaap gaan haal die ekspediese leier die haasboud uit die kar uit, trek die magasyn en gee twee rondtes vir kollega J. “Jy sal weet waarvoor dit is wanneer die tyd kom”, is al wat hy gesê het.

Nodeloos om te sê, toe kollega J opstaan was die twee rondtes nog stewig in sy ore vasgedruk. Die dokters reken as dit nie daarvoor was nie kon hy dalk permanente gehoorskade opgedoen het.

 

Die agterstorie

Die stukkie nonsens wat jy gelees het is meestal waar. Ons het op die Doringrivier gaan roei in die winter van 2002. Die Doring het slegs genoeg water in die winter wanneer dit reën in die Kaap en die water is so koud dat dit ‘n vereisde is dat jy met ‘n duikpak roei. Dit was ook die einde van my korporatiewe loopbaan. Na ons terugkeer van die spanbou het ek uit ‘n tuiskantoor begin werk.

Die boer het wel aan die listerpomp gewerk toe ons daar aankom, en ons kon eers die volgende more stort, maar ek twyfel of my snorkery iets daarmee uit te waai gehad het. Die twee jagters is inderdaad in die vroeë oggendure weg, om te loop jag. In een of ander bisarre insident het die hangkas in Pretoors se kamer omgeduiwel bo-oor die bed, wat hy toe wel moes repareer iewers in die nagtelike ure.

Kliek op die skakel hieronder om te sien waar die basiskamp is op google maps  Die mond

Kliek op hierdie skakel om te sien hoe ‘n Caterpilaar D11 lyk CAT D11

Laastens. ‘n Haasboud is slang vir ‘n pistool. 9mm Copper jacket rondes pas lekker in die menslike oor. ‘n Truuk wat ons geleer het by oom Peewee se army. Die SAW en seuns korporasie Bpk.

 

9mm

 

Advertisements

5 thoughts on “04 – Doringrivier balkesaag kampioen

  1. Dis onlekker om maters te groet, maar wat ‘n kostelike saerige onthou. Dis lekker om jou stories te lees. My soort Afrikaans.

    Oor saery :My Rots word ook by byeenkomste enkel ingeboek. Na 34 jaar is dit my wiegelied en soms, soos elke aand kry hy maar so tikkie in die ribbes dat ek net by diepslaap kan uitkom.

  2. 😆

    So ek kan seker nie TE veel kla oor my manne se gesnork nie? Ons mure staan darem nog!

    Lekker om die oggend met ‘n storie te begin, dankie.

    O ja, ek kry nie ‘n like knoppie om te druk nie. Dalk is ek rerig net te rigting bedonnerd om hom te kry, maar ek laaik dit hoor!

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s